झापा । झापाको बिर्तामोडमा पेट्रोल छर्किएर एक युवकले आत्मदाहको प्रयास गरेका छन् ।

बिर्तामोडको मुक्तिचोकमा मंगलबार अपराह्न चार बजे शरीरमा पेट्रोल छर्किएर बिर्तामोड ७ बस्ने ३४ वर्षीय विजय चौधरीले आत्मदाहको प्रयास गरेका हुन् ।

जिल्ला प्रहरी कार्यालय झापाका अनुसार घटनापछि चौधरीलाई तत्काल उद्धार गरी अटोमा हालेर उपचारका लागि बीएण्डसी अस्पताल लगिएको छ । उनको शरीरको पछाडिको भाग १५ देखि २० प्रतिशत जलेको बताइएको छ ।

आत्मदाहको प्रयास गरेका चौधरी केही समय अघि मेडिकल माफियाका रुपमा परिचित दुर्गा प्रसाईं उर्फ ‘मार्सी’को सहयोगीका रूपमा रहेका बुझिएको छ । तर, केही महिनादेखि उनी बेरोजगार रहेको बताइएको छ।

उनले किन आत्मदाह गरे भन्ने कारण खुलेको छैन् ।