धनगढी। सुदूरपश्चिम प्रदेशका मुख्यमन्त्री कमल शाह डिल्लीबजार कारागारमा रहेका नागरिक उन्मुक्ति पार्टीका संरक्षक रेशम चौधरीको घरमा पुगेका छन् ।

कैलालीको जानकी गाउँपालिका ६ स्थित जगतपुर पुगेर मुख्यमन्त्री शाहले रेशम चौधरीलाई रिहा गर्न पहल गर्ने बताएका हुन् ।

उनले चौधरीलाई रिहा गर्न आफूले पहल गर्ने प्रतिबद्धता जनाए । रेशमको घर पुगेर आमा सुल्फी देवी चौधरीलाई भेट्दै मुख्यमन्त्री शाहले यस्तो प्रतिबद्धता जनाएका हुन् ।

मुख्यमन्त्री शाहले भने, ‘टीकापुरको घटनाले सामाजिक सद्भावमा ठेस पुर्‍याएको छ । हामी त्यसलाई पुरानै स्थितिमा ल्याउने प्रयास गरिरहेका छौँ । केन्द्र सरकारले रेशम चौधरीलाई छिटो रिहा गर्नुपर्छ । म त्यसको लागि लागिपरेको छु ।’

टीकापुरको घटनाले सामाजिक सद्भावमा ठेस पुगेको उनको भनाई थियो । पुस २७ गते मुख्यमन्त्रीमा नियुक्त भएका एमाले संसदीय दलका नेता राजेन्द्रसिंह रावलले विश्वासको मत नपाएपछि राजीनामा दिएका थिए ।

शाहले पनि ३० दिन भित्र विश्वासको मत लिनु पर्ने छ । उनले आज आफूले ३० दिन भित्र विश्वासको मत पाउने दाबी समेत गरेका छन् ।