रौतहट । पूर्व-पश्चिम राजमार्ग अन्तर्गत रौतहटको धन्सार नजिक मोटरसाइकल अनियन्त्रित भई दुर्घटना हुँदा एक जना शिक्षकको मृत्यु भएको छ ।

मृत्यु हुनेमा सर्लाही जिल्ला हरिवन नगरपालिका-७ का किरण घिसिङ लामा रहेका छन् ।

पूर्वबाट पश्चिमतर्फ जाँदै गरेको मधेस प्रदेश ०४-००१-प ३५५७ नम्बरको मोटरसाइकल आफै अनियन्त्रित दुर्घटना भएको थियो ।

दुर्घटनामा गम्भीर घाइते भएका मोटरसाइकल चालक लामाको चन्द्रपुर हस्पिटलमा उपचारको क्रममा आइतबार राती ८ बजे मृत्यु भएको ट्राफिक प्रहरी कार्यालय रौतहटले बतायो ।

मृत्यु भएका घिसिङ बाराको निजगढ स्थित होली एन्जल्स इङ्लिस बोर्डिङ स्कुलमा शिक्षकको रूपमा कार्यरत थिए । घटनाको सम्बन्धमा इलाका प्रहरी कार्यालय चन्द्रनिगाहपुरले थप अनुसन्धान गरिरहेको जनाएको छ।