काठमाडौं । प्रधानमन्त्री पुष्पकमल दाहाल ‘प्रचण्ड’ गृहमन्त्रीको जिम्मेवारी राष्ट्रिय स्वतन्त्र पार्टीका सभापति रवि लामिछानेलाई नदिने निष्कर्षमा पुगेका छन् । प्रधानमन्त्री प्रचण्ड लामिछानेको नागरिकतासम्बन्धी मुद्दाको फैसलाको पूर्णपाठ नआएसम्म नयाँ गृहमन्त्री नियुक्त नगर्ने निर्णयमा पुगेका हुन् ।

योग्यता सर्वोच्चबाट गुमाएका लामिछानेले बारम्बार गैर सांसदका रूपमा आफूलाई गृहमन्त्री बनाउन भनेर दबाब दिन प्रधानमन्त्री प्रचण्डलाई दर्ई पटक भेटेका थिए । भने सरकारको सहयात्री एमालेले पनि लामिछानेलाई गृहमन्त्री बनाउन दबाब दिएको थियो । तर लामिछानेलाई अहिलेको अवस्थामा गृहमन्त्रालय नदिने र गृहमन्त्रालय पनि आफूसँगै राख्ने निर्णयमा दाहाल पुगेका हुन् ।

मंगलबार पेरिसडाँडामा बसेको माओवादी केन्द्रको पदाधिकारी बैठकपछि पार्टी सचिव गणेश साहले लामिछानेको मुद्दाको फैसलाको पूर्णपाठ नआउँदासम्म गृहमन्त्री नियुक्तीका बारेमा निर्णय नहुने जानकारी दिए । त्यस बेलासम्म गृह मन्त्रालय प्रधानमन्त्रीले आफूसँगै राख्ने उनले स्पष्ट पारे ।

लामिछाने मंगलबार बिहानै प्रधामन्त्री दाहाललाई भेट्न बालुवाटार पुगेका थिए । त्यहाँ उनले आफूलाई ६ महिनाका लागि गैरसांसदका रूपमा गृहमन्त्री बनाउन माग गरेका थिए । गैर सांसद मन्त्री बन्ने संवैधानिक व्यवस्थाअनुसार नै आफूलाई गृहमन्त्रीमा फर्काउन उनको माग थियो । आफूलाई गृहमन्त्री नबनाए रास्वपा सरकारबाट बाहिरिने समेत सभापति रविले चेतावनी दिएका थिए ।