एजेन्सी । भारतले दक्षिण अफ्रिकामा जारी महिला यू-१९ महिला विश्वकपको फाइनलमा इंग्ल्यान्डलाई ७ विकेटले हराउँदै उपाधि जितेको छ ।

पहिलो पटक भएको महिला यू–१९ विश्वकप उपाधि जित्दै भारतले इतिहास रचेको छ ।

जितको लागि ६९ रनको विजयी लक्ष्य पछ्याएको भारतले १४ ओभरमा तीन विकेट गुमाउँदै पूरा गर्यो । भारतकी सौम्या तिवारीले ३७ बलमा ३ चौकासहित सर्वाधिक २४ रनमा अविजित रहिन् ।

कप्तान शफाली बर्मा ११ बलमा १ चौका र १ छक्कासहित १५ रनमा आउट भइन् ।

इंग्ल्यान्डकी रियाना म्याकडोनाल्ड गेले २४ बलमा ३ चौकासहित सर्वाधिक १९ रन बनाइन् । नियाम हल्याण्ड १०, एलेक्सा स्टोनहाउस र सोफिया स्मालेले ११–११ रन बनाइन् ।

महिला यू–१९ विश्वकपमा कुल १६ टोलीको सहभागीता थियो ।

भारतले सेमिफाइनल खेलमा न्युजिल्यान्डलाई ८ विकेटले हराउँदै फाइनलमा स्थान बनाएको थियो । इंग्ल्यान्डले अष्ट्रेलियालाई सेमिफाइनलमा तीन रनले हराएको थियो ।

प्रतियोगितामा इंग्ल्याण्डकी ग्रेस स्क्रिभेन्स प्लेअर अफ दि सिरिज घोषित भइन् ।