काठमाडौं। अख्तियार दुरुपयोग अनुसन्धान आयोगले नेपाल विद्युत प्राधिकरणका आठ अधिकारीविरुद्ध २० लाखभन्दा बढी भ्रष्टाचार गरेको आरोपमा विशेष अदालतमा आरोपपत्र दायर गरेको छ।

प्राधिकरणको जनकपुर क्षेत्रीय कार्यालयअन्तर्गत तत्कालीन बर्दिवास उप–वितरण केन्द्र (हाल गौशाला वितरण केन्द्र)का तत्कालीन प्रमुख सञ्जीव शर्मासहित आठजनाविरुद्ध कार्यालयको सफ्टवेयरमा हेरफेर गरी २० लाखभन्दा बढी राजस्व अपचलन गरेको आरोपमा नगद बिगो मागदाबीसहित विशेष अदालतमा आज आरोपपत्र दायर गरिएको आयोगले विज्ञप्ती मार्फत जनाएको छ ।

आरोपित शर्मामाथी रातको समयमा कर्मचारीहरुको पासवर्ड आफैं राखी गोप्य तरिकाले काम गर्ने, मातहतका कर्मचारीका गम्भीर गल्तीलाई सामान्य सोधपुछका भरमा छोड्ने, संप्रेषण गर्नुपर्ने सूचना माथिल्लो निकायमा नपुर्‍याउने, आफूमा नभएको अधिकार प्रयोग गर्ने, मौखिक आदेशका भरमा काम गराउने, एनएस रेभेन्यु सफ्टवेरमा डाटा हेरफेर गरी २० लाख ३३ हजार २७२ रूपैयाँ राजस्व हिनामिना गरेको अभियोग आयोगले लगाएको छ।

यसैगरी कार्यालयका तत्कालिन ज्यालादारी कर्मचारीहरू अरविन्दप्रसाद जयसवाल, बागेश्वरीकुमारी कर्ण, चन्द्रभुषण महतो, धर्मेन्द्रकुमार महतो, अजितमान सिंह, स्मिता कट्टेल, अञ्जुकुमारी बस्नेतमाथि विभिन्न प्रपञ्चमार्फत् राजस्व अपचलन गरेको अभियोगमा मुद्दा दायर गरिएको छ।

सफ्टवेयरको डाटा हेरफेर गरी आर्थिक अपचलनको अभियोग लागेका जयसवाललाई चार लाख ७५ हजार ४७६, कर्णलाई ५३ हजार ८२१, चन्द्रभूषण महतोलाई चार लाख ६ हजार १३९, धर्मेन्द्रकुमार महतोलाई ६६ हजार ८३७, सिंहलाई २२ हजार ८१३, कट्टेललाई सात लाख ७४ हजार १०४ तथा बस्नेतलाई १२ हजार १४ रूपैयाँ बिगो कायम गरिएको अख्तियारका प्रवक्ता प्रदीपकुमार कोइरालाले जनाएका छन्।