काठमाडौं । प्रमुख निर्वाचन आयुक्त दिनेशकुमार थपलियाले सामाजिक सञ्जाललाई पनि नियमन तथा व्यवस्थापन गर्नुपर्ने बताएका छन् ।

बिहीबार काठमाडौंमा आयोजित ‘आम निर्वाचन २०२२ को मिडिया अनुगमन प्रतिवेदनसम्बन्धि राष्ट्रिय कार्यशाला गोष्ठी’ मा बोल्दै उनले सामाजिक सञ्जाललाई प्रेस काउन्सिल नेपालले आफ्नो दायरामा ल्याएर अनुगमन गर्न सक्छ कि सक्दैन ? भनि प्रश्न समेत गरे ।

उनले सबै सञ्चारमाध्यमहरूमा प्रकाशित तथा प्रसारित सामग्रीहरू स्वतः आउने गरी सफ्टवेयरको विकास गर्न नेपाल प्रेस काउन्सिलसँग आग्रह गरे । त्यसो गरिँदा अनुगमनको काम गर्न प्रेस काउन्सिललाई सहज हुने उनको भनाइ थियो ।

प्रमुख निर्वाचन आयुक्त थपलियाले सो सफ्टवेयरलाई हेर्नका लागि प्रेस काउन्सिलले छुट्टै टिम बनाउँदा उपयुक्त हुने सुझाव समेत दिए ।