विराटनगर । नेपाल टी-२० लिगमा स्पट फिक्सिङको आरोपमा पूर्वक्रिकेटर महबुब आलमलाई प्हरीले पक्राउ गरेको छ । आलमलाई आज बिहान विराटनगर बसपार्क नजिकैको भिन्तुना होटलबाट पक्राउ गरिएको हो ।

महबुबलाई काठमाडौं पठाइएको प्रहरीले जनाएको छ । उनी हिसान मिटका लागि विराटनगर आएको बेला पक्राउ परेका हुन् । उनलाई कान्तिपुर कलेजले प्रशिक्षकका रुपमा हिसान मिटमा सहभागी हुन विराटनगर बोलाएको थियो ।

प्रहरीको केन्द्रिय अनुसन्धान ब्युरो (सीआईबी)ले महबुब नेपाल टी-२० लिगमा स्पट फिक्सिङमा संलग्न रहेको पाएपछि प्रहरीले उनलाई पक्रेको हो ।

उनले नेपाल क्रिकेट संघ (क्यान)को रणनीति साझेदार सेभेन थ्री स्पोर्टस्का मालिक जतिन अहुवालियाको योजना अनुसार स्पट फिक्सिङमा सहयोग गरेको सीआईबी स्रोतले जनाएको छ ।

सीआईबीका स्रोतका अनुसार आलमले जतिनलाई अन्य खेलाडीहरुसँग पनि सम्पर्क गर्न सहयोग गरेका थिए । उनी प्रतियोगितामा खेलाडीका रुपमा भने थिएनन् ।