काठमाडौं । जातीय विभेद मुद्दामा पक्राउ परेका पोखरा महानगरपालिका वडा २४ का वडाध्यक्ष भरतबहादुर अधिकारी धरौटीमा रिहा भएका छन् ।

न्यायाधीश ऋषिराम आचार्यको एकल इजलासले ‘आरोपितलाई थुनामै राखेर मुद्दा चलाउनुपर्ने उपयुक्त कारण नदेखिएको’ ठहर गरेपछि उनी १ लाख ५० हजार रुपैयाँ धरौटीमा रिहा भएका हुन् ।

सोही वडाकी वडासदस्य मैया नेपालीलाई जातीय विभेद गरेको किटानी जाहेरीपछि उनी पक्राउ परेका थिए । उनलाई जिल्ला अदालत कास्कीले शुक्रबार धरौटीमा रिहा गरेको हो । उनीविरुद्ध मैयाले नै किटानी जाहेरी दिएकी थिइन्।

आफूविरुद्ध उजुरी परेसँगै वडाध्यक्ष अधिकारीले पुस २६ गते प्रहरीमा आत्मसमर्पण गरेका थिए । अधिकारीले पुस १८ गते वडामा डाकिएको स्थानीय आमा समूहहरु भेलामा मैयामाथि जातीय विभेदजन्य गाली गरेका थिए।