काठमाडौं । उपप्रधान तथा गृहमन्त्री रवि लामिछाने आज चितवन लागेका छन्। चितवन क्षेत्र नम्बर २ बाट प्रतिनिधिसभामा निर्वाचित भएका गृहमन्त्री लामिछाने बुद्ध एयरमार्फत बिहीबार चितवन जान लागेका हुन्।

लामिछानेका सचिवालय संयोजक दीपक बोहराले चितवन जान लागेको बताए। लामिछाने बसमा सवार भिडिओ सार्वजनिक गर्दै बोहराले भनेका छन्, ‘चितवन जाँदै छौं।’

चितवन जाने क्रममा उनले त्रिभुवन अन्तर्राष्ट्रिय विमानस्थलमा सर्वसाधारणसँगै बसको यात्रा गरेका छन्। विमानस्थलको धवनमार्गदेखि जहाज भएको स्थानसम्म पुग्नका लागि लामिछानेले सर्वसाधारण चढेको बसमा यात्रा गरेका छन्।

भिडिओमा लामिछानेले सर्वसाधारणसँग गफ गरेको सुनिन्छ। सोही बसमा रहेकी एक महिलाले लामिछानेप्रति आफूहरुलाई आश भएको भन्दै प्रशंसा गरेकी छिन्।

साथै, ती महिलाले राजादेखि राष्ट्रपतिसम्म भोगेको भन्दै घन्टौं लाइनमा बस्नपरेको बताएकी छिन्। जवाफमा गृहमन्त्री लामिछानेले ‘सँगै हिँड्ने’ प्रतिवद्धता जनाएका छन्।