काठमाडौं। काठमाडौं उपत्यका अपराध अनुसन्धान कार्यालयले वैदेशिक रोजगारीमा पठाउने भन्दै फेसबुकमा विज्ञापन देखाई ठगी गर्ने एक जनालाई पक्राउ गरेको छ ।

पक्राउ पर्नेमा सुर्खेतको भेरीगंगा नगरपलिका घर भई हाल नागार्जुन नगरपलिका ४ रानीपाटी बस्ने २३ वर्षीय मनम घर्ति रहेका छन् ।

घर्तिले सुरज थापा नामबाट फेसबुकमा विज्ञापन गरेर पीडितहरूलाई सम्पर्कमा ल्याउँने गरेको प्रहरीले बताएको छ ।

विदेशी नम्बरको ह्वाट्स एपमा सम्पर्क गरेपछि आरोपीले पीडितहरूलाई आफ्नै खातामा पैसा जम्मा गर्न लगाउँथे ।

पैसा जम्मा गरेपछि सक्कल नागरिकता र पासपोर्ट मागेर पीडितकै नामको सिमकार्ड निकालेर अनलाइन बैंकिङ मार्फत ‘ओटिपी’ कोड लिएर पैसा चोर्ने गरेको अनुसन्धानबाट खुलेको छ ।

मनम र अर्का एकजना मिलेर १८ लाख ठगेको उपत्यका अपराध अनुसन्धान कार्यालयले जनाएको छ । ठगेको रकम दुबईमा बस्ने शेर बहादुर चौधरीलाई पठाउने गरेको मनमले प्रहरीलाई बताएका छन् ।

आरोपीहरू विरुद्ध ४ जनाले जाहेरी दिएका छन् । मनमको डेराबाट प्रहरीले १७ वटा नागरिकता बरामद गरेको छ ।