काठमाडौं । नेकपा माओवादी केन्द्रकी सांसद रेखा शर्माले उपराष्ट्रपति बन्न आएको प्रस्ताव अस्वीकार गरेकी छन्।

शर्माले एमाले अध्यक्ष केपी शर्मा ओली र प्रधानमन्त्री पुष्पकमल दाहाल ‘प्रचण्ड’बाट आएको प्रस्तावलाई अस्वीकार गरेकी हुन्।

माओवादी केन्द्रको उच्च स्रोतका अनुसार शर्मालाई एमाले अध्यक्ष ओली र प्रधानमन्त्री प्रचण्डले उपराष्ट्रपति बन्न आग्रह गरेका थिए।

शर्मा उपराष्ट्रपति बने उनी निर्वाचित भएको दाङ क्षेत्र नं २ मा उपनिर्वाचन गर्नुपर्ने हुन्थ्यो। त्यस्तो अवस्थामा एमाले महासचिव शंकर पोखरेललाई उम्मेदवार बनाउने ओलीको योजना थियो।

ओलीको योजनामा प्रचण्डसमेत सहमत भएका थिए। मंसिर ४ गते भएको निर्वाचनमा दाङ-२ मा शर्माले पोखरेललाई १ सय ९३ मतले हराएकी थिइन्।

सांसद शर्मालाई राजीनामा गराएर एमाले महासचिव शंकर पोखरेललाई उपचुनाव लडाउने प्रयास तत्काललाई रोकिएको छ । उनी माओवादी केन्द्रबाट प्रत्यक्ष निर्वाचित एक्लो महिला सांसद हुन् ।