काठमाडौं । काठमाडौंमा जारी नेपाल टी–२० क्रिकेटमा आजबाट दर्शकले नि:शुल्क प्रवेश पाउने भएका छन् ।

कीर्तिपुरमा जारी नेपाल टी–२० लिग हेर्न दर्शक मैदान नपुगेपछि नेपाल क्रिकेट संघ (क्यान) ले बुधबारदेखि टिकट निशुल्क गरेको हो।

क्यानले भारतीय कम्पनी सेभेन थ्री स्पोर्टस्लाई लिगको जिम्मा दिएको थियो। लिगमा कहिलेसम्म प्रवेश नि:शुल्क हो भन्ने नखुलाएपनि अहिलेका लागि निशुल्क प्रवेश गरिएको छ।

टी २० लिगमा यसअघि ३ सय रुपैयाँ टिकट मूल्य राख्दा खेल हेर्न दर्शक नआएपछि टिकट मूल्य घटाइएको थियो।

मूल्य घटाएर १ सय रुपैयाँ राख्दा पनि दर्शक नआएपछि आजदेखि प्रवेश नि:शुल्क गरिएको हो।

३ सय रुपैयाँ टिकट मूल्य महँगो भएको भन्दै आलोचना पनि भएको थियो। प्रवेश नि:शुल्क गरिएसँगै आजदेखि दर्शक बढ्ने अपेक्षा गरिएको छ।