काठमाडौं । नेकपा माओवादी केन्द्रले प्रदेश १ मा सरकारको नेतृत्वमा दावी गरेको छ ।

बुधबार बसेको प्रदेश समितिको पदाधिकारी बैठकले नयाँ गठबन्धन बन्दा प्रदेश १ को नेतृत्व माओवादीले गर्न पाउनु पर्ने दावी गरेको हो ।

सरकार गठन र अन्य दलसँगको सहकार्यका लागि ३ सदस्यीय वार्ता टोली गठन गरेको छ । पार्टीका सचिव राम कार्कीको संयोजकत्वमा रहेको वार्ता टोलीमा इन्द्रबहादुर आङ्बो र हर्कबहादुर नेम्वाङ सदस्य छन् ।

प्रदेश १ मा माओवादीका १३ जना प्रदेश सांसद रहेका छन् । नयाँ गठबन्धनमा एमालेका ४० जना प्रदेश सांसद रहेका छन् ।

यस्तै नयाँ गठबन्धनमा रहेको राप्रपाका ६ र जसपाका एक जना प्रदेश सदस्य रहेका छन् । माओवादीले बनाएको वार्ता टोलीले शीर्ष नेताहरुसँग छलफल थालेको छ ।