काठमाडौं । मनकामना केबलकारको प्यानलमा क्षति पुग्दा अनिश्चितकालका लागि बन्द गरिएको छ ।

मनकामना दर्शन प्रा.लिका अनुसार विद्युत् आपूर्तिमा भएको समस्याका कारण केबलकारको प्यानलमा क्षति पुगेको हो ।

मर्मतका लागि केबलकारको निर्माता कम्पनी अष्ट्रियाको डोपलमायरका प्राविधिक आउनुपर्ने भएकाले सेवा अनिश्चितकालका लागि बन्द गरिएको कम्पनीले जनाएको छ ।

अर्को सूचना जारी नभएसम्म केबलकार सेवा स्थगन रहने कम्पनीले जानकारी गराएको छ । ”यसबाट पर्न गएको असुविधाप्रति हामी क्षमाप्रार्थी गर्दछौँ । यथासक्दो चाँडो सेवा सुचारु गर्नेछौँ,” कम्पनीले सोमबार बिहान जारी गरेको सूचनामा उल्लेख छ ।