काठमाडौं । अमेरिका कतारमा जारी २२ औं संस्करणको फिफा विश्वकप फुटबलको नकआउट चरणमा प्रवेश गरेको छ ।

गएराति इरानलाई १–० गोलले हराउँदै अमेरिका नकआउट चरणमा पुगेको हो । अमेरिकाको जितमा क्रिस्टियन पुलिसिचले निर्णायक गोल गरे ।

उनले खेलको ३८ औं मिनेटमा गोल गरेका थिए । यो जितसँगै अमेरिका समूह ‘बी’ को उपविजेता बन्दै नकआउट चरणमा पुग्न सफल भयो । अमेरिकाले ३ खेलमा ५ अंक जोड्यो ।

३ अंक जोडेको इरान तेस्रो स्थानमा रहँदै प्रतियोगिताबाट बाहिरियो । अब क्वार्टरफाइनल प्रवेशका लागि अमेरिकाले समूह ए को विजेता नेदरल्याण्ड्ससँग प्रतिस्पर्धा गर्नेछ।