हुम्ला । ढुङ्गा लागेर एक जना नेपाली सेनाका अमल्दार गम्भीर घाइते भएका छन् ।

कर्णाली कोरिडोरको हुम्ला खण्डको दुल्ली कुनादेखि लालीबगर क्षेत्रको सुनाखाडाको चट्टानी भीर विस्फोट गर्ने क्रममा उछिट्टिएको ढुङ्गा लागेर अमल्दार खेमराज पोखरेल घाइते भएका हुन् ।

बराहदल गुल्म रानी बनका गुल्मपति सुरेन्द्र श्रेष्ठले घटनाको पुष्टि गर्दै आइतबार दिउँसो भीर विस्फोट गर्दा ड्युटीमा खटिएका अमल्दार पोखरेल गम्भीर घाइते भएको बताए । उनको टाउको र दायाँ खुट्टामा गम्भीर चोट लागेको निर्माणमा खटिएको सेनाले जनाएको छ ।

गम्भीर घाइते पोखरेलको सुर्खेतबाट आएको सेनाको हेलिकोप्टरले उद्धार गरी उपचारका लागि नेपालगन्ज लगिएको छ । गुल्मपति श्रेष्ठले पोखरेलको अवस्था चिन्ताजनक रहेको बताइएको छ ।