रुकुम । रुकुम पूर्वको प्रदेश सभा क्षेत्र ‘क’ मा स्वतन्त्र उम्मेदवार सुरुल पुन मगर विजयी भएका छन् ।

सत्ता गठबन्धनका साझा उम्मेदवार नेकपा माओवादी केन्द्रका तेजबहादुर ओलीलाई ५३३ मतले पराजित गर्दै पुन विजयी भएका हुन् । उनले बिजुलीको बल्ब चुनाव चिन्ह लिएर चुनाव लडेका थिए ।

स्वतन्त्र उम्मेदवार पुनले चार हजार ४६५ मत प्राप्त गरे । उनका निकटतम प्रतिस्पर्धी ओलीले तीन हजार ९३२ मत प्राप्त गरे ।

ओली नेकपा माओवादी केन्द्रका पोलिटब्युरो सदस्य हुन् भने पुन नेकपा माओवादी केन्द्र लुम्बिनी प्रदेश समितिका सदस्य रहेका थिए । स्वतन्त्र उम्मेद्वारी दिएपछि उनलाई पार्टीले कारबाही गरेको थियो ।