काठमाडौं । सीमा क्षेत्रबाट उद्धार गरिएका नेपालीहरुलाई क्वारेन्टिन स्थलमा लिएर जाँदै गरेको टिपर कालीकोटमा दुर्घटना भएको छ ।

दुर्घटनामा परी दुई जनाको मृत्यु भएको खबर प्राप्त भएको छ भने चार जना घाइते भएका छन् ।

कालीकोटको लालीघाट नजिकै जिते बजारबाट यात्रु लिएर रासकोटतर्फ जाँदै गरेको ना८ख ५१३३ नम्बरको टिपर आज बिहान नरहरीनाथ गाउँपालिकामा कर्णालीमा खसेको हो ।

जिल्ला प्रहरी कार्यालय कालीकोटका प्रमुख डिएपसी श्यामबाबु औलियाका अनुसार टिपरमा ३९ जनाभन्दा बढी सवार भएको अनुमान गरिएको छ ।

उनका अनुसार जितेबजारको पारीपट्टी कर्णाली र तिला नदीको संगमस्थलमा टिप्पर खसेको छ । टिप्पर झन्डै ३ सय मिटरमाथिबाट खसेको हुनसक्ने पनि उनले बताए ।

घटनाको थप विवरण भने आउन बाँकी छ ।