काठमाडौं ।काठमाडौं उपत्यकामा मंसिर १ देखि निर्वाचन अवधिभर मदिरा बिक्री वितरणमा रोक लगाउने निर्णय गरिएको छ । काठमाडौं, भक्तपुर र ललितपुरका प्रमुख जिल्ला अधिकारीहरूले बुधबार सो निर्णय गरेका हुन् ।

मंसिर आज रातिबाट राति १२ बजेदेखि मंसिर ४ को मध्यराति सम्म मदिरा बिक्रीमा रोक लगाउने निर्णय गरिएको काठमाडौंका प्रमुख जिल्ला अधिकारी घनश्याम उपाध्यायले जानकारी दिए ।

काठमाडौंका प्रमुख जिल्ला अधिकारी उपाध्यायको संयोजकत्वमा बुधबार बसेको तीनै जिल्ला प्रमुखसहितका सुरक्षा अधिकारी सम्मिलित बैठकले मदिरा विक्रीवितरण तथा सेवनमा निषेध गर्ने निर्णय गरेको हो ।

उनले मतगणनास्थलमा भने मतगणना नसकिँदासम्म मदिरा बेचबिखनमा रोक लगाइएको छ । यस्तै बैठकले उपत्यकामा ४ मंसिर आइतबारका दिन सवारी–साधन सञ्चालनमा समेत रोक लगाउने निर्णय गरेको छ । निर्वाचन आयोगले तोकेको मापदण्डबाहेकका सवारी–साधन सञ्चालनमा रोक लगाउने निर्णय गरिएको हो ।