गोरखा । गोरखामा नेकपा एमालेका प्रतिनिधिसभा सदस्य उम्मेदवार रहेका अब्दुस मियाँको टोलीमाथि आक्रमण भएको छ ।

आइतबार राति पाँच जनाको समूहले खाना खाने क्रममा पालुङटार नगरपालिका-७ स्थित म्याङ्गो रिसोर्टमै बियरको बोतलले आक्रमण भएको हो ।

आक्रमणबाट एमाले प्रदेश सचिवालय सदस्य हरि काफ्लेको टाउकोमा गहिरो चोट लागेको प्रहरीले जनाएको छ । उनलाई स्थानीय स्वास्थ्य संस्थामा सात वटा टाँका लगाएर थप उपचारका लागि काठमाडौं लगिएको छ ।

घटनामा संलग्न राम सापकोटा र अजित पन्तलाई नियन्त्रणमा लिइएको जिल्ला प्रहरी कार्यालय गोरखाले जनाएको छ । कुटपिट गर्ने अन्य तीन फरार रहेको बताइएको छ ।

गोरखा–२ बाट माओवादी केन्द्रका अध्यक्ष पुष्पकमल दाहाल प्रचण्डविरुद्ध मियाँ चुनावी मैदानमा उत्रिएका छन् ।