काठमाडौं । प्रहरीले न्युरोडस्थित जुद्ध शालिक नजिक भएको हत्यामा संलग्न एक जनालाई पक्राउ गरेको छ । पक्राउ पर्नेमा मकवानपुरको हेटौंडा १२ घर भएका ६२ को जितबहादुर लामा रहेका छन् ।

कात्तिक १५ गते मंगलबार बिहान ६ः४५ बजे न्युरोडको जुद्द शालिक नजिक अन्दाजी ४४–४५ वर्षका एक पुरुषको शव फेला परेको थियो । पहिचान नखुलेका ती पुरुषको हत्यामा संलग्न रहेका लामालाई पक्राउ गरिएको जिल्ला प्रहरी परिसर काठमाडौंले जनाएको छ ।

घटनामा संलग्न व्यक्तिको पहिचान भएपनि उनी फरार रहेका कारण खोजी कार्य जारी राखिएको थियो । आरोपीको खोजी गर्ने क्रममा बुधबार प्रहरी वृत्त जनसेवाको टोलीले आरोपित जितबहादुर लामालाई बाङ्गेमूढाबाट पक्राउ गरेको हो ।

मंगलबार बिहानै पुरुषको शव भेटिएपछि प्रहरी वृत्त जनसेवाबाट डीएसपीको कमाण्डमा प्रहरी टोली घटनास्थलमा खटिएर अनुसन्धान सुरु गरेको थियो ।

पक्राउमा परेका लामा उपर मुलुकी अपराध संहिता, २०७४ को परिच्छेद-१२ को ‘ज्यान सम्बन्धी कसूर’ मा प्रहरी बृत्त जनसेवाबाट थप अनुसन्धान भइरहेको बताइएको छ । मृतकको शव महाराजगञ्जस्थित त्रिवि शिक्षण अस्पतालमा राखिएको छ ।