काठमाडौं । नेपाली कांग्रेसका सभापति एवं प्रधानमन्त्री शेरबहादुर देउवाले गठबन्धनका कारण टिकट खोसिएकालाई अन्य तरिकाले न्याय गर्ने बताएका छन् ।

सत्तारुढ गठबन्धनले सोमवार काठमाडौंमा आयोजना गरेको प्रदेशस्तरीय भेलालाई सम्बोधन गर्दै प्रधानमन्त्री देउवाले यस्तो बताएका हुन् ।

उनले ठूलो लडाइँ लडेर ल्याएको लोकतन्त्र बचाउनको लागि गठबन्धन अपरिहार्य रहेको जिकिर गरे। देउवाले गठबन्धन गर्दा सबै पार्टीका आकांक्षीले टिकट पाउन नसकेको भन्दै भोलिको दिनमा सबै पार्टीले न्याय गर्ने बताए ।

उनले भने, ‘यो गठबन्धनलाई टिकाउन गठबन्धनका सबैले एक भएर लागेर गठबन्धनको विजय गराउनु पर्नेछ,गठबन्धन बनेको छ, चुनाव जितिहालिन्छ भन्ने भएर सबैलाई टिकट चाहिएको छ ।’

संविधानले व्यवस्था गरेको निर्वाचन प्रणालीका कारण कुनै पनि पार्टीको बहुमत आउन नसक्ने भएकोले गठबन्धन अपरिहार्य रहेको उनले दाबी गरे ।