काठमाडौं । राप्रपा नेपालका अध्यक्ष कमल थापासँग असन्तुष्ट पदाधिकारीले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ लाई भेटेका छन् ।

मंगलबार पाँचै जनाले प्रचण्ड निवास खुमलटार पुगेर भेटेका हुन् । प्रचण्डसँग भेट गर्नेमा उपाध्यक्ष श्याम तिमल्सिना, महामन्त्री केशव श्रेष्ठ, सहमहामन्त्री दमन बस्नेत, कोषाध्यक्ष ज्ञानेन्द्र कार्की र प्रवक्ता सुरेश आचार्य छन् ।

४ मंसिरमा हुने प्रदेशसभा र प्रतिनिधिसभा निर्वाचनमा १०० भन्दा बढी चुनाव क्षेत्रमा उम्मेदवार उठाएर अध्यक्ष थापा आफू चाहिँ एमालेको चिह्नबाट उठेकोमा राप्रपा नेपालमा असन्तुष्टि छ ।

पाँचै जना नेताले अहिले पार्टी प्रवेश नगर्ने तर, गठबन्धनका उम्मेदवारलाई सहयोग गर्ने प्रतिबद्धता गरेको जनाईएको छ । आफ्नो चुनाव चिन्ह छाडेर सूर्यबाट लड्ने थापाको निर्णयप्रति पार्टीमा असन्तुष्टि बढेको छ ।