काठमाडौं । प्रधानमन्त्री निवास बालुवाटारमा सत्ता गठबन्धनका शीर्ष नेताहरूको बैठक बसिरहेको छ । प्रदेश र प्रतिनिधि सभा निर्वाचनको सिट बाँडफाँटको टुंगो लगाउन गठबन्धन दल निर्णायक छलफलमा जुटेका हुन् ।

असोज २३ गते सम्म उम्मेदवारको मनोनयन दर्ता गर्नुपर्ने भएकाले दलहरू माथि दसैं अगावै सिटको भागबन्डा टुंग्याएर उम्मेदवार चयनको छलफल गर्नुपर्ने दबाब छ ।

गठबन्दन स्रोतका अनुसार प्रतिनिधि सभातर्फको सिट बाँडफाँटको विषय लगभग टुंगो लागिसकेको छ । त्यसैले आइतबारदेखि कार्यदलमा प्रदेश सभाको सिट बाँडफाँटबारे छलफल हुँदै आएको छ ।

कार्यदलमा नेपाली कांग्रेसबाट कृष्णप्रसाद सिटौला, महामन्त्री गगनकुमार थापा र ज्ञानेन्द्रबहादुर कार्की छन् भने माओवादी केन्द्रबाट महासचिव देव गुरुङ र उपमहासचिव वर्षमान पुन छन् ।

यस्तै, नेकपा एकीकृत समाजवादीबाट उपाध्यक्ष प्रमेश हमाल र महासचिव बेदुराम भुसाल, जनता समाजवादी पार्टीबाट रामसहाय यादव र रकम चेम्जोङ तथा राष्ट्रिय जनमोर्चाबाट हिमलाल पुरी र आनन्द शर्मा सदस्य छन् ।