काठमाडौं । नेपाल पेट्रोलियम ढुवानी व्यवसायी महासंघले हड्तालका कार्यक्रम फिर्ता लिएर पेट्रोलियम पदार्थ ढुवानी पूर्ववत रुपमा संचालन गर्न थालेका छन् । महासंघ र नेपाल आयल निगमबीच बुधबार साँझ तीन बुँदे सहमति भएपछि पेट्रोलियम ढुवानी सुरु भएको हो ।

महासंघका माग असोज ७ गतेसम्म पूरा गर्ने सहमति भएपछि हड्तालका कार्यक्रम फिर्ता भएको जनाइएको छ । महासंघ २०७३ सालपछि डिजेल बाहेकका अन्य संचालन खर्च नबढाएको भन्दै हड्तालमा उत्रिएको थियो ।

यही भदौ २४ गतेदेखि भारतमा तेल लिन जान उनीहरुले रोकेका थिए । उनीहरूले बुधबारबाट आन्तरिक ढुवानी बन्द गरी १ असोजबाट देशभर इन्धन आपूर्ति ठप्प पार्ने घोषणा गरेका थिए ।

उद्योग वाणिज्य तथा आपूर्तिमन्त्री दिलेन्द्र बडू, नेपाल आयल निगमका कार्यकारी निर्देशक उमेश थानी र महासंघका पदाधिकारीहरुबीच बुधबार साँझ भएको छलफलमा ढुवानी भाडा समायोजनको विषय असोज ७ गतेभित्रमा सम्बोधन गरिसक्ने सरकारी प्रतिबद्धतापछि व्यवसायीले आन्दोलन फिर्ता लिएका हुन् ।