काठमाडौं । त्रिभुवन अन्तर्राष्ट्रिय विमानस्थलमा अवैध सुनसहित एक जना भारतीय नागरिक पक्राउ परेका छन् । पक्राउ पर्नेमा ३४ वर्षीय विकास महाजन रहेका छन् ।

सारजाह एभिएसन सर्भिसको जी९५३६ नम्बरको फ्लाइटमा भन्सार छली गरी अवैध रूपमा सुन ल्याई कारोबार गर्न लागेको भन्ने गोप्य सूचनाको आधारमा प्रहरीले उनलाई पक्राउ गरेको हो ।

विशेष अनुसन्धान टोलीले गोल्डेन गेट नजिक रहेको ट्याक्सी पार्किङबाट महाजनलाई शङ्कास्पद अवस्थामा पक्राउ गरेको हो । खानतलासी गर्दा निजले लगाएको सेण्डो भेष्टमा सुन जस्तो पहेँलो पेष्ट गरेको धातु फेला पारेको थियो ।

त्यसलाई तौल गर्दा ४०८ ग्राम र निलो रंगको अन्डरवेयरमा सुन जस्तो पहेँलो देखिने कपडामा पेष्ट गरेको धातुसहित तौल गर्दा ३६९ ग्राम गरी जम्मा ७७७ ग्राम तौल रहेको थियो । उनको साथबाट ५०० दरको भारतीय रुपैयाँ १९ हजार ५०० र ४२० दिराम पनि प्रहरीले फेला पारेको छ ।