काठमाडौं । हत्या गरेको आरोपमा तीनजना युवक पक्राउ परेका छन् ।

भोजपुरको हतुवागढी गाउँपालिका–८ घर भइ काठमाडौं–६ सिनामंगल सानधारा महाङकालमा फल्स सिलिङ्ग मिस्त्री काम गर्दै आएका २६ वर्षीय मनोज राईको हत्या आरोपमा उनीहरु पक्राउ परेका हुन् ।

बौद्ध प्रहरी वृत्तबाट खटिएको टोलीले तीन जनालाई पक्राउ गरेको हो । पक्राउ पर्नेमा हतुवागढी गाउँपालिका–९ का १९ वर्षीय बिमल राई, १८ वर्षीय जीतेन राई र १९ वर्षीय सञ्जय राई रहेको काठमाडौं जिल्ला प्रहरी परिसरले जनाएको छ ।

मादक पदार्थ सेवन गरी एक आपसमा झगडा गरिरहेको भन्ने सूचना पाएपछि प्रहरी घटनास्थल पुगेको थियो । तर कुटपिटमा संलग्न तीनजना फरार भइसकेको र मनोज घाइते अवस्थामा फेला परेका थिए ।

गम्भीर अवस्थामा फेला परेका मनोजलाई प्रहरीले उपचारका लागि चावहिलस्थित हेल्पिङ हेल्प अस्पताल लगेको थियो । तर त्यहाँ उपचारका क्रममा मनोजको मृत्यु भएको काठमाडौं जिल्ला प्रहरी परिसरले जनाएको छ ।

उनीहरुलाई शनिबार राति नै ११ बजे गौरीघाटठबाट पक्राउ गरिएको थियो । पक्राउ परेकामाथि उपर मुलुकी अपराध (संहिता) ऐन, २०७४ को परिच्छेद-१२ को “ज्यान सम्बन्धी कसूरमा” काठमाडौं जिल्ला अदालतबाट ७ दिनको म्याद थप अनुमति लिई प्रहरी बृत्त बौद्बबाट थप अनुसन्धान भइरहेको बताइएको छ ।