काठमाडौं। श्रम, रोजगार तथा सामाजिक सुरक्षामन्त्री शेरबहादुर कुँवरले मन्त्रालयको कल सेन्टरमा बसेर गुनासो सुन्न थालेका छन् । आइतवार उनले ६ जना श्रमिकहरूको गुनासो सुनेका हुन् ।

मन्त्री कुँवरले अबदेखि प्रत्येक आइतवार प्रत्यक्ष रूपमा श्रमिकहरूको गुनासो सुन्ने कार्यको शुरुआत गरेको जानकारी दिए ।

आइतवार श्रममन्त्री कुँवरसँग विदेशबाट श्रमिकको शव ल्याउन नसकेको, मलेसिया तथा अन्य देशमा जान म्यानपावरहरूले लाखौं रकम लिएको लगायतका गुनासो राखेका थिए ।

अबदेखि प्रत्येक आइतवार बिहान १० बजेदेखि १२ बजेसम्म कल सेन्टरमा बसेर गुनासो सुन्ने उनले बताए ।

मन्त्री कुँवरले श्रमिकको गुनासो सुन्दै विदेश जाने श्रमिकलाई ठगी गर्नेलाई पीडितले प्रमाणसहित ल्याए तत्काल कानूनअनुसार कारबाही गर्ने बताए ।

उनले १० वर्ष अगाडि ठगी गर्नेसमेत पक्राउ गर्ने काम भएको भन्दै ठगी गर्ने क्षणिक समयको लागि राम्रो भएपनि अन्त्यमा कानूनको कठघरामा ल्याउने आश्वासन दिए ।