रुपन्देही । रुपन्देहीमा अज्ञात समूहको गोली प्रहारबाट एकजना गम्भीर घाइते भएका छन् ।

जिल्लाको ओमसतिया गाउँपालिका वडा नम्बर ४ बसन्तपुरमा गोली प्रहारबाट सिद्धार्थनगर नगरपालिका वडा नम्बर १ बेलहियाका बिकास गुरुङ घाइते भएका हुन् ।

आइतबार राति करिब ११ बजेतिर बसन्तपुर वडा कार्यालय अगाडि गुरुङसँग जम्का भेट भएपछि उक्त समूहले गोली प्रहार गरेको प्रहरीले जनाएको छ । मोटरसाइकलमा आएको तीन जनाको समूहले उनीमाथि गोली प्रहार गरेको जिल्ला प्रहरी कार्यालय रुपन्देहीले जनाएको छ ।

गुरुङको बायाँ कोखामा गोली लागेको र उनको युनिभर्सल मेडिकल कलेज भैरहवामा उपचार भइरहेको छ । घटनास्थल र आसपासमा प्रहरी परिचालन गरिएको र गोली प्रहार गर्ने समूहको खोजी भइरहेको रुपन्देही प्रहरीले जनाएको छ ।