काठमाडौं । नेपाल र केन्याबीच हुन लागेको टी–२० र एक दिवसीय सिरिजको खेल तालिका सार्वजनिक भएको छ । नेपाल क्रिकेट संघ (क्यान) ले मंगलबार केन्या भ्रमणको खेल तालिका सार्वजनिक गरेको हो ।

केन्या भ्रमणमा नेपालले सुरुमा पाँच ट्वान्टी(२० अन्तर्राष्ट्रिय क्रिकेट खेल्नेछ । त्यसपछि तीन खेलको एकदिवसीय शृङ्खला खेल्नेछ । त्यसका लागि नेपालले अगस्ट २५ देखि सेप्टेम्बर ५ सम्म केन्या भ्रमण गर्नेछ ।

पहिलो ट्वान्टी-२० अन्तर्राष्ट्रिय खेल अगस्ट २५ मा खेल्नेछ । दोस्रो खेल २६, तेस्रो खेल २८, चौथो खेल २९ र पाँचौ खेल अगस्ट ३० मा खेल्नेछ ।

सेप्टेम्बर २ बाट एकदिवसीय अन्तर्राष्ट्रिय शृङ्खला सुरु हुनेछ । दोस्रो खेल सेप्टम्बर ३ र अन्तिम खेल सेप्टेम्बर ५ मा हुनेछ ।

नेपालले सोमबार मात्र भारतका पूर्व अलराउन्डर मनोज प्रभाकरलाई मुख्य प्रशिक्षकमा नियुक्त गरेको थियो । प्रभाकरकै नेतृत्वमा नेपाल केन्या भ्रमणमा निस्कनेछ । प्रशिक्षक प्रभाकर शुक्रबारसम्म नेपाल आउने क्यानले जनाएको छ ।