काठमाडौं । नेकपा (एमाले) की सांसद् गंगा चौधरीले बाहुनले दलित तथा आदिवासीसँग बिहे गरेर कोटा खानु समानुपातिकको दुरुपयोग भएको बताएकी छन् । बुधबार सिंहदरबारमा बसेको महिला तथा सामाजिक समितिको बैठकमा बोल्दै उनले सो कुरा बताएकी हुन् ।

उनले हरेक आदिवासी तथा जातजातिको क्लस्टर छुट्ट्याएका कारण कसैले पनि अर्काको कोटा खान नमिल्ने बताइन् । यस्तो प्रावधान अन्त्य हुनुपर्ने उनको माग छ ।

त्यस्तै उनले निर्वाचनमा महिलाको सहभागिता बढाउन प्रत्येक जिल्लामा प्रत्यक्ष निर्वाचन प्रणालीमार्फत महिलाहरूबीच प्रतिस्पर्धा गराउनुपर्नेमा जोड दिइन् ।

उनले हरेक पटकको निर्वाचनमा एक प्रदेशमा महिला–महिलाबीच प्रतिस्पर्धा गराउन अभ्यास गर्नुपर्ने भन्दै महिला–महिला र पुरुष–पुरुषबीच प्रतिस्पर्धा गराइएमा महिलाको सहभागिता बढ्ने उनको भनाई थियो । उनले निर्वाचनको मिति घोषणा भएपछि सत्तापक्षले आफ्ना कर्मचारीको सरुवा बढुवा गर्ने गरेको बताउँदै त्यस्तो खालको नीतिको अन्त्य हुनुपर्ने बताइन् ।