काठमाडौं । अर्थ र सञ्चार तथा सूचना प्रविधिमन्त्री डा. युवराज खतिवडाले पदबाट राजीनामा दिएसँगै उनले सम्हाल्दै आएको मन्त्रालयहरुको कार्यभार प्रधानमन्त्री केपी शर्मा ओलीलाई दिइएको छ ।

राष्ट्रपति विद्यादेवी भण्डारीले अर्थ र सञ्चार मन्त्रालयको कार्यभार प्रधानमन्त्री ओलीले सम्हाल्ने गरी कार्यभार तोकेकी हुन् ।

राष्ट्रपति कार्यालयले जारी गरेको विज्ञप्तिअनुसार आजैबाट लागू हुनेगरी प्रधानमन्त्रीले सो कार्यभार सम्हाल्नेछन् ।

प्रधानमन्त्री ओली मिर्गौला प्रत्यारोपणका लागि टिचिङ अस्पताल भर्ना भएका छन् । उनको भोलि बिहान शल्यक्रिया हुँदै छ ।

यसैबीच दुई वर्षे कार्यकाल समाप्त भएपछि आज पदबाट राजीनामा दिएका खतिवडाले भोलि पुनः अर्थमन्त्रीको शपथ लिने भएका छन् ।

राष्ट्रियसभाको कार्यकाल सकिएसँगै उनले आज राजीनामा दिएका थिए । प्रधानमन्त्री सचिवालय स्रोतका अनुसार खतिवडालाई भोलि बिहान पुनः अर्थमन्त्रीमा शपथ गराउने तयारी छ ।