काठमाडौं । कानून व्यवसायीसँगको घुसवारेको अडियो विवादमा मुछिएका जिल्ला अदालत काठमाडौंका न्यायाधीश राजकुमार कोइरालाले आफूले घुस खाने नियत नराखेको दावी गरेका छन् ।

उनले कानून व्यवसायी रुद्र पोखरेलले आफूलाई झुक्याएर फोन गरेको र बारम्बार आफ्नो कुरा सुनिदिन आग्रह गरेकाले फोनमा कुरा गरेको बताए ।

सिभिल वचत तथा ऋण सहकारी संस्थाका तत्कालिन अध्यक्ष इच्छाराज तामाङको मुद्दाको विषयमा अधिवक्ता पोखरेल र न्यायाधीश कोइरालाबीच घुस लेनदेनको विषयमा भएको संवाद हालै सार्वजनिक भएको छ । न्यायाधीश कोइरालाले भने आफुले कुरा सुनिदिएको मात्र बताए ।

न्यायाधीश कोइरालाका अनुसार, इच्छाराज तामाङ लगायतका आरोपित जोडिएको सिभिल सहकारीको मुद्दामा धेरै जनाको दबाव थियो । धेरैले फोन गरेपछि उनले स्वीच अफ गरेर आफू बसेको बताए ।