काठमाडौं । प्रहरी नायब महानिरीक्षक (डीआईजी) बाट प्रहरी अतिरिक्त महानिरीक्षक (एआईजी) मा पदोन्नति भएका नेपाल प्रहरीका पाँच प्रहरी अधिकारीले दर्ज्यानी चिन्ह (फूली) लगाएका छन् ।

नेपाल सरकार मन्त्रिपरिषद्को यही जेठ २३ गतेको निर्णयले एआईजीमा बढुवा भएका उनीहरुलाई प्रहरी महानिरीक्षक (आईजीपी) धिरज प्रताप सिंह प्रहरी प्रधान कार्यालयमा बुधबार आयोजित एक समारोहकाबीच दर्ज्यानी चिन्ह प्रदान गरेका हुन् ।

एआईजीमा पदोन्नति भएका उत्तमराज सुवेदी, अरुणकुमार बिसी, दिवेश लोहनी, मुकुन्द राज आचार्य र पूजा सिंहलाई आईजीपी सिंहले दर्ज्यानी चिन्ह लगाएका हुन् ।

समारोहमा आईजीपी सिंहले पदोन्नति भएका एआईजीहरुलाई बधाई दिँदै पदोन्नतिपछि प्राप्त नयाँ जिम्मेवारी र उत्तरदायित्व वहन गर्नको निम्ति सफल हुने विश्वास समेत व्यक्त गरे ।