काठमाडौं । तारा एयरको विमान दुर्घटनामा हराइरहेको एउटा शव पनि भेटिएको छ । तारा एयरको ९ एनइटी जहाज दुर्घटना भएको तेस्रो दिन बिहान बेपत्ता एउटा शव भेटिएको हो ।

योसँगै जहाजमा सवार २२ जनाकै शव भेटिएको जिल्ला प्रहरी कार्यालय मुस्ताङले जनाएको छ । सोमबारसम्म २१ जनाको शव भेटिएकोमा मंगलबार बिहान थप एक जनाको शव भेटिएको जिल्ला प्रहरी कार्यालय मुस्ताङका प्रहरी नायब उपरीक्षक रामकुमार दानीले बताए ।

खोँचमा अड्किरहेको अवस्थामा शव फेला परेको उनले बताए । दानीका अनुसार थासाङ–२ को सानसुरेमा रहेको घटनास्थलबाट १० वटा शव कोबाङ ल्याइएको छ । खराब मौसमका कारण समाचार तयार पार्दासम्म २ वटा शव घटनास्थलमा नै रहेको छ । बाँकी दुईवटा शव ल्याएपछि १२ वटा नै शव काठमाडौँ लग्ने तयारी रहेको प्रहरीले जनाएको छ ।

योसंगै तारा एअर जहाज दुर्घटनामा परेका सबै जनाको शव संकलन गर्ने काम सकिएको डिएसपी दानीले बताए । सोमबार १० वटा शव काठमाडौँ ल्याइएको छ ।

तीनजना चालक दलका सदस्य र १९ यात्रु लिएर आइतबार बिहान ९ः५५ मा पोखराबाट जोमसोमका लागि उडेको तारा एयरको नाइन–एनएइटी विमान हराएको १९ घण्टापछि सोमबार बिहान दुर्घटनाग्रस्त अवस्थामा भेटिएको थियो ।