काठमाडौं । मधेस प्रदेशको एक मात्र महानगर वीरगन्ज महानगरपालिकाको मेयरमा सत्तागठबन्धनका साझा उम्मेदवार राजेशमान सिंह विजयी भएका छन् ।

नेकपा एमालेका मेयरका उम्मेदवार एवं निवर्तमान मेयर विजय सरावगीलाई २२ हजार ५ सय ४४ मतको फराकिलो अन्तरले पराजित गर्दै राजेशमान मेयरमा निर्वाचित भएका हुन् ।

राजेशमानले ४६ हजार दुई सय १५ मत ल्याए । एमालेका सरावगीले २३ हजार छ सय ७१ मतमात्रै ल्याए । उपमेयरमा भने सत्ता गठबन्धनबाट उम्मेदवार कांग्रेसका नेता इम्तियाज आलम विजयी भए । उनले ३० हजार ७८ मत ल्याएका छन् ।

उपमेयरमा एमाले-लोसपा गठबन्धनका उम्मेदवार लोसपा नेता पुरूषोत्तम लाल झाले नौ हजार पाँच सय ६८ मत ल्याए ।