रुपन्देही । मतदानको केही समयमात्र बाँकी हुँदा रुपन्देहीको मर्चवारी गाउँपालिका–५ का नेकपा एमालेका वडा अध्यक्षका उम्मेदवार सोमनाथ पाण्डेको घरमा विस्फोट भएको छ ।

विस्फोटपछि पाण्डेयको घरमा क्षति पुगेको मर्चवारी गाउँपालिका एमालेका अध्यक्ष उम्मेदवार कमलेस यादवले बताए ।

बम विस्फोटमा परि पाण्डेको बुहारी ५० वर्षीय जयमाला पाण्डेय गम्भीर घाइते भएकी छन् । उनलाई उपचारका लागि भैरहवामा लगिएको छ । निर्वाचन सकिन लागेको समयमा दिउसो ४ बजेतिर विस्फोट भएको बताइएको छ ।

यसैबीच संखुवासभाको चैनपुरस्थित एउटा मतदान केन्द्रनजिकै विस्फोट भएको छ। चैनपुर नगरपालिका–४ को बालज्योति आधारभूत विद्यालयभन्दा २० मिटर टाढाको बाँस झ्याङमा विस्फोट भएको जिल्ला प्रहरी कार्यालयले जनाएको छ ।

अहिले नेपाली सेनाको टोलीले सो क्षेत्रको अनुसन्धान गरिरहेको छ।