काठमाडौँ ।  नेकपा एमालेका अध्यक्ष केपी शर्मा ओलीले कांग्रेस पनि एक्लै चुनाव लड्ने स्थितिमा नरहेको वताएका छन्।

ओलीले  देश मूलतः दुईदलीय प्रणालीतर्फ गएको समेत बताए । भक्तपुरको सूर्यविनायकस्थित महेन्द्रशान्ति विद्यालय ‘क’ मतदान केन्द्रबाट भोट हालेपछि अध्यक्ष ओलीले प्रधानमन्त्री शेरबहादुर देउवाले वैशाख ९ गतेसम्म पनि आफूलाई निर्वाचन सार्न प्रस्ताव गरेको दाबी गरे ।

ओलीले भने, ‘प्रधानमन्त्री शेरबहादुर देउवाले गत वैशाख ९ गतेसम्म पनि औपचारिक रूपमा वैशाख ३० बाट चुनाव सार्ने प्रस्ताव गर्नुभयो । मैले अस्वीकार गरेकाले सहमति नमिलेपछि चुनाव तोकिएकै समयभित्र भएको छ ।

धाक लगाउने कुरा होइन, मैले अस्वीकार गरेर देशलाई द्वन्द्वतिर नधकेल्नुस्, अलोकतान्त्रिक बाटो नहिँड्नुस्, भनेर उहाँलाई राम्रैसँग खबर पठाएको थिएँ । निर्वाचन रोक्ने कुरामा सहमति हुन नसकेपछि र कानुनले बाध्यता भएपछि उहाँहरु तयार हुनुभएको हो । ९ गतेसम्म पर सारौँ भन्नुहुन्थ्यो । आज आफैंले शंकाको बीचमा भोट हाल्नुभयो होला नि भन्नुभएको छ तर शंका होइन, सप्रमाणको कुरा बाहेक केही छैन । मैले यो कुरा भनेको थिइनँ ।’