एजेन्सी । रुसका विदेश मन्त्री सेर्गेइ लाभ्रोभले युक्रेनसँगको वार्ता फेरि अगाडि बढाउने भएका छन् । रुसको भ्रमण गरेका संयुक्त राष्ट्रसङ्घका महासचिव एन्टोनियो गुटेर्रेससँगको भेटवार्तापछि उनले वार्ताका लागि रुस तयार रहेको बताएका हुन् ।

भेटवार्तापछि दुवै जनाले संयुक्त रुपमा आयोजना गरेको पत्रकार सम्मेलनमा लाभ्रोभले युक्रेनसँगको रुसको द्वन्द्व कूटनीतिक तरिकाबाट नै समाधान गर्नुपर्नेमा आफूहरू सहमत रहेको बताए ।

उनले आफ्नो तर्फबाट यसअघि पनि वार्ताको पहल भएको, पटक-पटक वार्ताहरू पनि भएको तर युक्रेनकै कारणले वार्ता सफल हुन नसकेको दावी गरे ।

रुसले युक्रेनमाथि आक्रमण गरेको दुई महिना पूरा हुँदासम्म पनि युद्ध अन्त्यको लक्षण नदेखिएपछि राष्ट्रसंघीय महासचिवले रुस भ्रमण गरेका हुन् ।

पत्रकार सम्मेलनमा महासचिव गुटेर्रेसले रुसी विदेशमन्त्री लाभ्रोभसँगको वार्ता सकारात्मक र उपलब्धीमूलक भएको भन्दै चाँडै नै शान्ति प्रक्रिया अगाडि बढ्ने विश्वास गरेको बताए । उनले लगत्तै युक्रेनको पनि भ्रमण गर्ने तालिका छ ।