काठमाडौं । जनकपुरधाममा सत्ता गठबन्धनको विरोध गर्दै नेपाली कांग्रेसका कार्यकर्ताले प्रदर्शन गरेका छन् ।

बुधबार सत्ता गठबन्धनको बैठकले उपमहानगरपालिकाको भागबण्डामा टुंगो लगाएपछि जनकपुरधाममा कांग्रेसका कार्यकर्ताहरुले प्रदर्शन गरेका हुन् ।

सत्तारूढ पाँच दलबीच जनकपुरधामको नेतृत्व जसपालाई दिने निर्णयपछि कांग्रेस कार्यकर्ता विरोधमा उत्रिएका हुन् ।

जनकपुरधामको विद्यापति चोकमा टायर बालेर नेपाली कांग्रेसका कार्यकर्ताहरुले गठबन्धनको विरोधमा प्रदर्शन गरेका हुन्। कार्यकर्ताको भावनासँग खेलवाड गरिएको भन्दै उनीहरुले सभापति शेरबहादुर देउवा र गठबन्धनविरुद्ध नारावाजी गरेका छन्।

यस्तै जनकपुरधाम उपमहानगरपालिकाका मेयर जनता समाजवादी पार्टी (जसपा) ले पाउने भनी केन्द्रीय गठबन्धनले गरेको निर्णय नमान्ने कांग्रेस नगर सभापति मनोज साहले चेतावनी दिएका छन् । ‘मधेसमा नेपाली कांग्रेसलाई समाप्त पार्ने यो रणनीति हो’, उनले भने ।