काठमाडौं । पाल्पाको रैनादेवीमा बस दुर्घटना हुँदा दुई जनाको मृत्यु भएको छ ।

रैनादेवी छहरा गाउँपालिका वडा नम्बर ६ बल्डेङगढीमा शुक्रबार दिउँसो उक्त बस दुर्घटनामा परेको हो ।

जिल्ला ट्राफिक प्रहरी कार्यालय पाल्पाका अनुसार लु १ च ४९०२ नम्बरको बस पानीडाँडाबाट जुठापौवातर्फ जाँदै गर्दा शुक्रबार दिउँसो दुर्घटनामा परेको थियो।

दुर्घटनामा परी गाडी मालिक अन्दाजी ४० वर्षीय विजय सारु र ८ वर्षका एक बालकको ज्यान गएको प्रहरीले जनाएको छ।दुर्घटनामा परेका ६ जनाको पाल्पास्थित मिसन अस्पतालमा उपचार भइरहेको बताइएको छ ।