काठमाडौं । निर्वाचन आयोगले गण्डकी प्रदेशसभाका सभामुख नेत्रनाथ अधिकारीलाई पनि स्पष्टीकरण सोधेको छ ।

निर्वाचन महंगो हुँदै गएको जनाउँदै सभामुख अधिकारीले आफूले पनि गत निर्वाचनमा आयोगले तोकेभन्दा बढी खर्च गरेको बताएका थिए । सोही विषयलाई लिएर आयोगले सभामुख अधिकारीसँग स्पष्टीकरण मागेको हो ।

आयोगलाई बुझाएको विवरणभन्दा बढी खर्च भएको भन्ने सभामुख अधिकारीको अभिव्यक्तिप्रति गम्भीर ध्यानाकर्षण भएको आयोगले जनाएको छ । आयोगमा बुझाएको विवरण ठीक हो वा होइन भनेर पनि प्रश्न गरेको छ ।

निर्वाचन आयोग ऐनले तोकेभन्दा बढी खर्च गर्नेलाई कारबाही हुने व्यवस्थाका विषयमा पनि आयोगले सचेत गराएको छ।सभामुख अधिकारीलाई ७ दिनभित्र जवाफ दिन माग गरेको छ ।