काठमाडौं । काठमाडौंमा ५० फिट गहिरो इनारमा खसेकी महिलाको सकुसल उद्दार गरिएको छ । सिन्धुपाल्चोक तातोपानी घर भई हाल काठमाडौंको बूढानीलकण्ठ नगरपालीका वडा नम्बर ३ मित्रचोकमा डेरा गरी बस्ने बर्ष ४५ की पेमा शेर्पालाई इनारबाट प्रहरीले सकुसल उद्धार गरेको हो ।

मित्रचोकस्थित हरि श्रेष्ठको घरबाट उनी हराई रहेको भन्ने सूचनाका आधारमा प्रहरीले खोजतलास गरेको थियो । महानगरीय प्रहरी प्रभाग बुढानीलकण्ठबाट प्रहरी निरीक्षकको कमाण्डमा ७ जनाको टोलीद्वारा खोज तलासमा खटिएको थियो । खोजी गर्ने क्रममा श्रेष्ठकै घरमा रहेको इनारभित्र उनी अचेत अवस्थामा फेला परेको महानगरीय प्रहरी परिसर काठमाडौंले जनाएको छ ।

त्यसपश्चात प्रहरी प्रधान कार्यालय बिपत ब्यबस्थापन महाशाखा सामाखुशीमा उद्दारको लागि समन्वय गरिएको थियो । बिपत ब्यबस्थापन महाशाखा सामाखुशीबाट प्रहरी निरीक्षकको कमाण्डमा १० जनाको प्रहरी टोली गरी १७ जनाको प्रहरी टोलीले अन्दाजी ५० फिट गहिरो इनारमा खसेकी महिलाको उद्वार गरेको हो ।

उनलाई उपचारको लागि बुढानीलकण्ठ नगरपालिका वडा नं १३ स्थित करुणा अस्पतालमा लगी उपचार भइरहेको प्रहरीले जनाएको छ । उनी अहिले बोल्न सक्ने भएकी छिन् । घटनाको विषयमा थप अनुसन्धान भइरहेको प्रहरीले जनाएको छ ।