काठमाडौं । कानुनविपरीत कार्य गरेको आरोपमा एक असइ पक्राउ परेका छन् । महानगरीय प्रहरी प्रभाग साँखुमा कार्यरत असई दिलिप खड्का पक्राउ परेका हुन् ।

उनी अपराधमा प्रयोग भएको डलर लुकाएको आरोपमा पक्राउ परेका हुन् । गत फागुन २ गते उनले डलर लुकाएको प्रहरीको प्रारम्भिक अनुसन्धानबाट खुलेको छ ।

सिन्धुपाल्चोकका रेशम बुढाथोकीले मकवानपुरका सुरेश न्यौपाने र कैलालीका वीरेन्द्रबहादुर खड्कालाई सस्तोमा डलर साटिदिने भन्दै आठ लाख लिएर ठगी गरेका थिए ।

डलर भनेर दिएको पोका कागजको बिटो मात्र भएको खुलेपछि बुढाथोकीमाथि लखेटेर कुटपिट भएको हो । गम्भीर घाइते भएका बुढाथोकीलाई साँखु प्रहरीले उद्धार गरी अस्पताल लगेको थियो । जसमा असइ खड्का अनुसन्धान गर्न गएका थिए। उनले बुढाथोकीसँग भेटिएको डलर लुकाएका हुन् ।

उनलाई समेत भक्तपुर प्रहरीले थुनामा राखी अनुसन्धान अघि बढाएको छ । उता गम्भीर घाइते भएका बुढाथोकीको उपचारको क्रममा मृत्यु भएको छ । प्रहरीले त्यसपछि न्यौपोने र खड्कालाई पनि ज्यान मुद्दामा कारबाही अघि बढाएको छ ।