पोखरा । जिल्ला अदालत कास्कीका दुई वटा इजलास कक्षमा तोडफोड भएको छ ।

अदालतको एक नम्बर र छ नम्बर इजलास कक्षमा मंगलबार राति तोडफोड भएको हो ।

प्रमुख न्यायाधीश श्रीकृष्ण भट्टराई र मा देवप्रसाद योगीले मुद्दा हेर्दै आएका एक नम्बर र छ नम्बरमा ढोका फुटाउन प्रयोग गरिएको फलामको रड पनि भेटिएको छ ।

एक नम्बर इजलास कक्षको ढोका मात्रै फोरिए पनि छ नम्बर इजलास कक्षमा भित्र रहेको दराज पनि फुटाइएको छ । दराजमा रहेका महत्त्वपूर्ण प्रमाण र मिसिलहरू चोरी भएको आशंका गरिएको छ ।

यस्तो कडा सुरक्षा घेराका बीच अदालतमा पसेर दराज फुटाइनुलाई शंकास्पद घटनाका रूपमा लिइएको छ । घटनाबारे थप अनुसन्धान भइरहेको जिल्ला प्रहरी कार्यालय कास्कीले जनाएको छ ।