काठमाडौँ । प्रहरीको केन्द्रीय अनुसन्धान ब्यूरो (सीआईबी)ले बैंकिङ कसुर मुद्दाकी एक फरार प्रतिवादीलाई पक्राउ गरेको छ ।

पक्राउ पर्नेमा ललितपुर जिल्ला ललितपुर महानगरपालिका- ६ घर भइ हाल भक्तपुर उपमहानगरपालिका -११ कमलविनायक बस्ने ४१ बर्षिया राधा
माताङ्गी रहेकी छन्।

सीआईबीका अनुसार माताङ्गीले सानिमा बैंकको सूर्य विनायक शाखामा रहेको आफ्नै नामको खाताबाट पर्याप्त रकम नभएको जान्दाजान्दै पनि रकम भुक्तान गर्नका लागि पीडितलाई चेक दिएकी थिइन् ।

माताङ्गीलाई उच्च अदालत पाटनबाट गत पुष २० गते बैंकिङ कसुर तथा सजाय ऐन २०६४ बमोजिमको कसुरमा १९ लाख रुपैयाँ जरिवाना र ५ दिन कैद हुने ठहर गरेको थियो ।

माताङ्गीलाई सुर्यविनायक, भक्तपुरबाट पक्राउ गरिएको सीआईबीको भनाइ छ । उनलाई फैसला कार्यन्वयनका लागि जिल्ला अदालत ललितपुरमा बुझाइएको सीआईबीले जनाएको छ ।