काठमाडौं । संसदीय समितिले इन्धनको बढ्दो मूल्यका कारण देशको अर्थतन्त्र जटिलतातर्फ अघि बढेको भन्दै पेट्रोलियम पदार्थको खपत घटाउन इन्धनमा कोटा तोक्नेदेखि भारतीय सवारीलाई पेटोलियम पदार्थ भर्न नदिनेसम्मको काम गर्न सरकारलाई निर्देशन दिएको छ ।

प्रतिनिधि सभा अन्तरगतको उद्योग तथा वाणिज्य र श्रम तथा उपभोक्ता समितिको बुधबार बसेको बैठकले खपत घटाउने गरी काम गर्न विभिन्न निर्देशन दिएको हो ।

समितिले सवारी साधनमा जोर÷बिजोर प्रणाली लागू गर्ने, इन्धन बिक्रीमा कोटा तोक्ने र भारतीय सवारी साधनलाई नेपालमा इन्धन भर्न रोक लगाउनेसम्मको उपाय अबलम्बन गर्न निर्देशन दिइएको छ । उनले त्यसैगरी समितिले निगमले पम्पहरुलाई दिने तेल कटौती गर्र्न र पेट्रोलको कर पनि घटाउन पनि निर्देशन दिएको छ ।

बढ्दो मूल्यकै कारण पेट्रोलियममा दैनिक सवा अर्ब रुपैयाँ बाहिरिन थालेपछि खपत घटाएर अर्थतन्त्र जोगाउन यस्ता निर्देशन दिइएको समिति सभापति बिमल श्रीवास्तवले बताए ।

कोरोना कालमा जनता बचाउन जोर–बिजोर लगाएको भन्दै अब अर्थतन्त्र बचाउन जोर–बिजोर लगाउनु पर्ने उनको धारणा थियो ।