काठमाडौं । नाबालिकामाथि जवर्जस्ती करणी गरेको आरोपमा तनहुँ प्रहरीको हिरासतमा रहेका अभिनेता पल शाहलाई बयानका लागि गैंडाकोट लगिने भएको छ ।

फागुन ११ गते एक नावालिका गायिकाले शाहले आफूमाथि जवर्जस्ती करणी गरेको भन्दै जाहेरी दर्ता गरेपछि १५ गतेदेखि शाह जिल्ला प्रहरी कार्यालय तनहुँको हिरासतमा छन् ।

१५ गते तनहुँ प्रहरी समक्ष आत्मसर्पण गरेका शाहकाविरुद्ध सोही दिन नै इलाका प्रहरी कार्यालय गैंडाकोटमा पनि जाहेरी दर्ता भएको थियो । सोही मुद्दाको बयानका लागि शाहलाई आज तनहुँबाट गैंडाकोट लाने तयारी भइरहेको तनहुँ प्रहरी स्रोतले अनलाईन नेपाललाई बतायो ।

पहिलो पटक जिल्ला अदालत तनहुँबाट दिएको सात दिनको म्याद समाप्त भएपछि पुनः १२ दिनको म्याद थपको अनुमति लिएर प्रहरीले उनीमाथि अनुसन्धान गरिरहेको छ ।

तनहुँ र गैंडाकोटको जाहेरी एकै किसिमका भएका कारण शाहविरुद्ध मुद्दा भने तनहुँबाट चल्ने भएको समेत प्रहरी स्रोतले बतायो ।

इलाका प्रहरी कार्यालय गैंडाकोटमा ती नाबालिकाले दर्ता गरेको जाहेरीमा २०७७ चैत ७ गते राति गैंडाकोट नगरपालिका–७ स्थित गैंडाकोट रिसोर्टमा बलात्कार गरेको उल्लेख छ ।