काठमाडौं । पल शाह अभिनित चलचित्र ‘म यस्तो गीत गाउँछु २’ का निर्देशक तथा निर्माता सुदर्शन थापालाई प्रहरीले नियन्त्रणमा लिएर समान्य साेधपुछ गरेको छ ।

प्राइमटाइम टेलिभिजनमा धमलाको हमला कार्यक्रममा अन्तर्वार्ता दिन पुगेका उनलाई टेलिभिजन परिसरबाटै प्रहरीले नियन्त्रणमा लिएको हो । यद्यपी उनले अन्तर्वार्ता भने दिइसकेको प्राइम टेलिभिजन स्रोतले बतायो ।

महानगरिय प्रहरी परिसरका प्रमुख एसएसपी सुदिप गिरीले भने अनलाईन नेपालसँग थापालाई नियन्त्रणमा नलिइएको बताए । उनले अनलाईन नेपालसँग भने–‘उहाँलाई पक्राउ गर्नुपर्ने कुनै कारण छैन । पक्राउ गरिएको होइन ।’

त्यसो हो भने सोधपुछका लागि नियन्त्रणमा लिइएको हो ? भन्ने अनलाईन नेपालको प्रश्नमा एसएसपी गिरीले भने–‘उहाँलाई नियन्त्रणमा पनि लिइएको होइन । उहाँसँग केही जानकारी लिन मात्रै खोजिएको हो ।’ कुन विषयमा जानकारी लिन खोजिएको हो भन्ने बारे भने उनले खुलाएनन् ।

नाबालिकामाथि करणी गरेको अभियोगमा प्रहरीमा जाहेरी परेपछि प्रहरीले पल शाहलाई भने फरार सूचीमा राखेको छ । गत बुधबार जिल्ला प्रहरी कार्यालय तनहुँमा शाहविरुद्ध एक गायिकाले जाहेरी दर्ता गराएकी हुन् । फरार रहेका शाहकै विषयमा प्रहरीले थापासँग केही जानकारी लिएको हुनसक्ने बताइएको छ ।